بافڵ جەلال تاڵەبانی، سەرۆکی یەکێتیی نیشتمانیی کوردستان و هادی عامری، سەرۆکی هاوپەیمانیی فەتح لە بەغداد کۆبوونەوە.
ئەمڕۆ لە بەغداد سەرۆکی یەکێتیی نیشتمانیی کوردستان و سەرۆکی هاوپەیمانیی فەتح کۆبوونەوە، لە کۆبوونەوەکەدا هێرشە تیرۆریستییەکەی سەر فڕۆکەخانەی عەربەت، سەروەریی خاکی عیراق و پرسی بەپارێزگابوونی هەڵەبجە گفتوگۆی لەبارەوەکرا و هەماهەنگی بەردەوامیی نێوان لایەنەکان بە ئامانجی چارەسەرکردنی کێشەکان و پاراستنی ئارامی و سەقامگیریی عێراق و هەرێم جەختی لێکرایەوە.
هەر لە کۆبوونەوەکەدا سەرۆک بافڵ جەلال تاڵەبانی لەبارەی دۆخی ئەمنی و لێکەوتەکانی هێرشەکەی سەر فڕۆکەخانەی عەربەت رایگەیاند، “دەستبردن بۆ دامەزراوە سەربازی، یاسایی و دەستوورییەکان پێشهاتێکی مەترسیدارە و پێویستە هەموومان پێکەوە رووبەڕووی ببینەوە، نابێت رێگەبدرێت لەژێر هیچ پاساوێکدا سنووری وڵات ببەزێنرێت”.
لەبارەی بە پارێزگابوونی هەڵەبجەوە سەرۆک بافڵ وتی، “یەکدەنگی و یەکگرتووییمان بەرامبەر بەپارێزگابوونی هەڵەبجە ئەرکێکی ئەخلاقی و نیشتمانییە و پێویستە هەموومان پشتیوانیی لێ بکەین”.
وتیشی، “تێکەڵکردنی هەڵەبجە بە کێشە سیاسییەکانەوە مایەی نیگەرانییە، چونکە ئەم پرسە پەیوەستە بە ویژدان و بەرپرسیارێتیمانەوە”.
