سەرۆكی هەرێمی كوردستان رایدەگەیەنێت، هەموو لایەك هەوڵمانداوە كێشەی مووچەی مووچەخۆرانی هەرێم چارەسەربكەین و دەشڵێت، “ئێمە كێشەكانمان لەگەڵ بەغداد تەنها بابەتی مووچە نییە و شاندێك پێكهاتوون لە سەرۆك وەزیران و جێگرەكەی و وەزیری دارایی دەچنە بەغداد بۆ چارەسەركردنی كێشەكان”.
نێچیرڤان بارزانی سەرۆكی هەرێمی كوردستان لە لێدوانێكی رۆژنامەوانیدا رایگەیاند، ئەو پابەندییە داراییانەی لەسەر هەرێمی كوردستان بووە بەرامبەر بەغداد جێبەجێكردووە و مووچە مافی مووچەخۆرانە و پێویستە هاوشێوەی فەرمانبەرانی عێراق مووچەی فەرمانبەرانی هەرێمی كوردستان دابەشبكرێت و وتیشی، “بۆ چارەسەركردنی كێشەكان شاندێك پێكهاتوون لە سەرۆك وەزیران و جێگرەكەی و وەزیری دارایی كە بۆ چارەسەركردنی كێشەكان دەچنە بەغداد”.
راشیگەیاند، ئەم حكومەتەی لە عێراق پێكهێندراوە كورد بەشداربووە و بەشێك سەرەكین، جگەلەوەش تەنها كێشەی مووچەمان لەگەڵ بەغداد نییە و ماددەی 140 و چەندین كێشەی دیكە هەیە كە پێویستە چارەسەربكرێن، لەگەڵ ئەوەشدا دەبێت روونبێتەوە كە ئێستا سیستمی عێراق فیدڕاڵییە یاخود مەركەزییە و ئەو مامەڵەیەی لەگەڵ هەرێم دەكرێت مامەڵەی فیدڕاڵی نییە.
