بەرەبەیانی ئەمڕۆ بومەلەرزەیەکی بەهێز بە گوڕی 6.8 پلە لە باشووری رۆژئاوای مەراکیش لە مەغریب روویدا و بەهۆیەوە نزیکەی 300 کەس گیانیان لەدەستدا و چەندین بیناش رووخان.
وەزارەتی ناوخۆی مەغریب لە کاتژمێرەکانی سەرەتای بەرەبەیانی ئەمڕۆ رایگەیاند، بەهۆی بوومەلەرزەکەوە 296 کەس گیانیان لەدەستداوە و 153 کەسیش برینداربوون، ئەوەشی خستەڕوو کە قوربانییەکان لە ناوچەکانی ئەلحوز، مەراکش، وزازات، ئەزیلال، شیشاوا و تارودانت تۆمارکراون.
بەشێک لە دانیشتوانی ئەو شارە ئەوەیان خستەڕوو، ژمارەیەک بینا رووخاون و تەلەفزیۆنی ناوخۆیی ئەو وڵاتەش ڤیدیۆی رووخانی منارەی مزگەوتێک و بڵاوبوونەوەی داروپەردووی رووخاوی سەر ئۆتۆمبێلەکانی بڵاوکردەوە.
مەراکیش، كە شارێکی گەشتیاریی کۆن و قەرەباڵغە، لەنێو ئەو ناوچانەی مەغریبدایە کە زۆرترین زیانیان بەرکەوتووە، لە گرتە ڤیدیۆییەکدا دەرکەوتووە دیوارێکی شارەکە کە مێژووەکەی دەگەڕێتەوە بۆ سەدەکانی ناوەڕاست بەشێکی کەوتۆتە خوارەوە و لەسەر شەقامەکە بڵاوبۆتەوە، هەروەها درزێکی گەورە لە یەکێک لە بەشەکانی تری دیوارەکەدا دەرکەوتووە.
#ئێستا
