لە خۆپیشاندانەکەی ئەمڕۆی شاری دهۆکدا کە پارتی “وەک بانگەشەی بۆ دەکرد”، بە مەبەستی پاڵپشتی لە کەرکوک و بەرگریی لەو شارە رێکیخستبوو، وێنەی چوار کەس وەک شەهیدانی خۆپێشاندانەکانی کەرکوک بەرزکرابوونەوە، یەکێک لەو کەسانە، نە خەڵکی شاری کەرکوکە، نە بەشداریی خۆپیشاندانەکانی ئەو شارەی کردووە و نە شەهیدیش بووە.
لە وێنەکاندا چوار کەس وەک شەهیدی خۆپیشاندانەکان وێنەیان بەرزکراوەتەوە، یەکێک لەو کەسانە ناوی “مەریوان کەریم تۆفیق”ـە، هاوڵاتییەکی شارۆچکەی چەمچەماڵە.
ئەو هاوڵاتییە بەشداریی لە خۆپیشاندانەکانی کەرکوکدا نەکردووە و پەیوەندیی بەو خۆپیشاندانانەوە نییە، شەهیدیش نەبووە و تا ئێستا لەژیاندایە.
هاوڵاتیی مەریوان کەریم تۆفیق، تەنها لە هەژماری تایبەتیی خۆی لە تۆڕی کۆمەڵایەتیی فەیسبوک، هاوخەمیی نیشانداوە بۆ شەهیدانی خۆپیشاندانەکانی چەند رۆژی رابردووی شاری کەرکوک، بەڵام پارتی و خۆپیشاندەرانی دهۆک وێنەی ئەو هاوڵاتییەیان وەک یەکێک لە شەهیدەکانی کەرکوک بەرزکردووەتەوە.
