بەهۆی سەرپێچیكردن لە رێنماییەكانی تەندروستی، ئەمڕۆ لە شاری هەولێر دەرمانخانەیەك و كۆگایەكی دەرمان لەلایەن تیمەكانی بەڕێوەبەرایەتیی KMCA لە وەزارەتی تەندروستی، داخران و بڕیاریشدرا لێپێچینەوەی یاساییان لەگەڵدا بكرێت.
بەپێی راگەیەندراوێكی بەڕێوەبەرایەتیی كوالێتیی كۆنترۆڵی سەر بە وەزارەتی تەندروستیی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، لە درێژەی پشكنین و بەسەركردنەوەكانی تیمی چاودێریی بازاڕی بەڕێوەبەرایەتیی KMCA لە وەزارەتی تەندروستیی حكومەتی هەرێمی كوردستان بە هەماهەنگی لەگەڵ لقی هەولێری سەندیكای دەرمانسازان و قائمقامیەتی قەزای ناوەندی هەولێر پشكنین بۆ ژمارەیەك لە دەرمانخانە و كۆگایەكی دەرمان ئەنجامدرا.
لە راگەیەندراوەكەدا هاتووە، لە ئەنجامی پشكنینەكە كۆگایەكی دەرمان و دەرمانخانەیەك بە هۆكاری سەرپێچیكردن لە ڕێنماییەكان داخران و لێپێچینەوەی یاساییان لەگەڵ كرا.
ئاماژە بۆ ئەوەش كراوە، بەڕێوەبەرایەتیی كۆنتڕۆڵی جۆری دەرمان بەردەوام هۆشداریدەدات بە سەرجەم ئەو شوێنانەی كە مامەڵە بە بەرهەمی دەرمانسازی و پزیشكییەوە دەكەن پابەندیی گشت ڕێنماییەكان بن و بە پێچەوانەوە رووبەڕووی سزای یاسایی توندیان دەكاتەوە.
