بەڕێوەبەرایەتیی دابەشكردنی كارەبای سلێمانی/ ڕۆژهەڵات رایدەگەیەنێت، لێخۆشبوونی قەرزی پارەی پسووڵەی كارەبا بە بڕی 15% بۆ سێكتەرەكانی بازرگانی، پیشەسازی، كشتوكاڵی و حكومی دەستپێدەكاتەوە.
بەپێی ئاگاداری نامەیەكی بەڕێوەبەرایەتیی دابەشكردنی كارەبای سلێمانی/ ڕۆژهەڵات كە وێنەیەكی دەست تۆڕی میدیایی ئێستا كەوتووە و تێیدا هاتووە، لێخۆشبوونی قەرزی پارەی پسووڵەی كارەبا بە بڕی 15% بۆ سێكتەرەكانی بازرگانی، پیشەسازی، كشتوكاڵی و حكومی دەستیپێكردەوە.
ئاماژە بۆ ئەوەش كراوە، لێخۆشبوونی 15%ی قەرزی كەڵەكەبووی پارەی كارەبا بۆ هەریەك لە سێكتەرەكانی (بازرگانی، پیشەسازی، كشتوكاڵی و حكومی) لەسبەینێوە دووشەممە 28ی ئابی 2023 دەچێتە بواری جێبەجێكردنەوە و تەنها بۆ ماوەی سێ مانگ بەردەوامدەبێت و بۆیە لە سبەینێوە ئەو هاوبەشانەی كارەبا كە خاوەنی پڕۆژە و شوێنی بازرگانی و پیشەسازی و كشتوكاڵین و دەكەونە سنوری كاری بەڕێوەبەرایەتیمان ( بەڕێوەبەرایەتی دابەشكردنی كارەبای سلێمانی /ڕۆژهەڵات) سەردانمان بكەن لە بینای بەرێوەبەرایەتیمان لە گەڕەكی قالاوا بۆ دانەوەی قەرزی پارەی كارەباكانیان بە داشكاندنی 15%.
