وەزارەتی كار و كاروباری كۆمەڵایەتی ژمارەیەك دەرفەتی دامەزراندنی بۆ چەند بوارێكی جیاواز لە سنووری پارێزگای سلێمانی راگەیاند.
وەزارەتی كار و كاروباری كۆمەڵایەتی بڵاویكردەوە، “رەخساندنی هەلی كار بۆ كۆمەڵێك لە دەرچووانی دانەمەزراو رادەگەیەنین بە شێوەی گرێبەست بۆ هەڵگرانی بڕوانامەی بەكالۆریۆس بۆناونیشانی( IT ،ژمێریاری، كارگێری، یاسایی، ئەندازیاری میكانیك، توێژەری كۆمەڵایەتی و زمانی ئینگلیزی)دەرچووانی (ئامادەیی، ناوەندی، سەرەتایی) بۆ پیشەی شۆفێری”.
ئاماژەی بۆ ئەوەش كرد، “پێویستە خوازیار تەمەنی لە نێوان 18-40 ساڵ بێت، دانیشتووی سلێمانی بێت، زانیاریی راست و دروست پێشكەشبكات و لە ئەگەری تۆماركردنی زانیاریی هەڵە و نادروست داواكاری دامەزراندنی رەتدەكرێتەوە، نابێت مووچەخۆر بێت لە هیچ دامودەزگایەكی حكومی و كەرتی تایبەتدا”.
وەزارەتەكە راشیگەیاندووە، “ئارەزوومەند پێویستە بەڵگەنامەكانی لە رۆژی سەردانكردنی ئامادەبكات (كارتی نیشتمانی، كارتی زانیاری، پشتگیریی ئەنجومەنی گەڕەك، بڕوانامە یان پشتگیریی دەرچوون)، دوای دابەشكردنی فۆرم لە رۆژانی یەكشەممە و دووشەممەی هەفتەی داهاتوو، دەبێت لە ماوەی سێ رۆژدا فۆرمەكان بگەڕێندرێتەوە ھەمان شوێن كە بەرێوەبەرایەتیی كاری سلێمانی لەناو بینای دەستەبەری(ضمان)سەروو بەریدەكە “.
