قوباد تاڵەبانی، جێگری سەرۆك وەزیرانی هەرێم، پێشوازیكرد لە هاكان فیدان وەزیری دەرەوەی توركیا و لە كۆبوونەوەی نێوانیاندا پەیوەندییەكانی نێوان هەرێم و توركیا و هەروەها پەیوەندییەكانی نێوان هەرێم و بەغداد تاوتوێكران.
لە تەوەرێكی كۆبوونەوەكەدا كە رۆژی پێنجشەمە 24ی ئابی 2023 لە هەولێر بەڕێوەچوو و تیایدا هەر یەكە لە دابان شەدەڵە جێگری بەرپرسی فەرمانگەی پەیوەندییەكانی دەرەوەی هەرێم و ئەحمەد موفتی بریكاری وەزیری سامانە سروشتییەكان ئامادەیبوون، گفتوگۆ كرا لەبارەی پەیوەندییەكانی نێوان هەرێم و توركیا و چارەسەركردنی گرفتەكان لەنێویشیاندا پرسی فڕۆكەخانەی سلێمانی، هەردوولاش هاوڕابوون لەسەر گرنگی پتەوكردنی پەیوەندییەكان لە بوارە جیاوازەكان و بە تایبەتیش لە بواری بازرگانیدا.
لە بەشێكی دیكەی كۆبوونەوەكەدا تاوتوێی كێشەكانی نێوان هەرێم و بەغداد كراو هەردوولا جەختیانكردەوە لەسەر پێویستیی چارەسەركردنی ناكۆكییەكان لە رێگەی گفتوگۆ و دانوستانەوە.
لەم چوارچێوەیەدا قوباد تاڵەبانی ئاماژەی بەوەدا سەرباری پەسەندكردنی یاسای بودجە، كێشەی ناردنی بەشە بودجەی هەرێم هێشتا بە تەواوی چارەسەر نەكراوە و وتیشی، “پەرتەوازەیی و نەبوونی یەكڕیزیی لەنێوان لایەنە كوردستانییەكان كاریگەری هەبووە لەسەر چارەسەر نەكردنی كێشەكانی نێوان هەرێم و بەغداد و بەتایبەتیش لە پرسی بودجەدا”.
