بەڕێوەبەرایەتیی گشتیی پۆلیسی راپەڕین، روونکردنەوەیەکی لەبارەی کوژرانی نیاز دەرگەڵەییەوە بڵاوکردەوە، ئاشکرایکردووە، لە پشکنینی تەرمەکەیدا شوێنەواری سێ گوللـە بە جەستەیەوە بووە.
بەڕێوەبەرایەتی پۆلیسی ڕاپەڕین رایگەیاندووە، “کاتژمێر 10:00ی شەوی رابردوو هاوڵاتیی (نیاز جلال بەگ) ناسراو بە نیاز دەرگەڵەیی ئەندامی پێشووی ئەنجومەنی ناوەندیی یەکێتی لە رووداوێکی کوشتنی نادیاردا گیانیلەدەستداوە”.
ئاماژەی بەوەشکردوە، تەرمی ناوبراو گەیەندرایە پزیشکی دادی رانیە و پشکنین بۆ تەرمەکەی ئەنجامدرا و دەرکەوت شوێنەواری سێ گوللـە بەجەستەیەوە هەیە.
بەڕێوەبەرایەتیی پۆلیسی راپەڕین دەڵێت، “بەوتەی کەسوکاری، روداوەکە لە کاتێکدا بووە کە ناوبراو لە رانیە سەر رێگای سەرەکیی قورەگۆ بۆ پشوو سەردانی باخەکەی کردووە و لە ئەنجامدا لە رووداوێکی کوشتنی نادیاردا گیانیلەدەستداوە”.
جەختکراوەتەوە کە رێکاری یاسایی گیراوەتەبەر و لێکۆڵینەوە دەستیپێکردووە بۆ زانینی هۆکاری راستەقینەی رووداوەکە و لێکۆڵینەوە بەردەوامە.
