دوای خنكانی دوو برا لە ئاوی دوكان، تیمەكان لە هەوڵەكانیان بۆ دۆزینەوەی تەرمی دووەم قوربانی بەردەوامن.
درەنگانی شەوی رابردوو دوو گەنج لەناو دەریاچەی دوکاندا خنکان کە برای دانیشتووی شاری كەركوك بوون و بەمەبەستی گەشتیاری سەردانی دوکانیان کردبوو.
ئارام عەلی، وتەبێژی بەرگریی شارستانیی سلێمانی بە تۆڕی میدیایی ئێستای راگەیاند، تیمەكانیان لە هەوڵەكان بۆ دۆزینەوەی دووەم تەرمی رووداوەكە بەردەوامن.
ئەوەش لەكاتێكدایە بەرەبەیانیی ئەمڕۆ تەرمی یەكێكیان دۆزرایەوە.
وتەبێژی بەرگریی شارستانی وتیشی، “ئاوی بەنداوی دوكان نەگیراوەتەوە، ئەگەر پێویست بكات، داوای گرتنەوەی دەكەن”.
رووداوەکە کاتێک بووە یەکێک لەو دوو برایە چووتە ناو دەریاچەکە بۆ مەلەکردن، بەڵام دوای کەمێک دیارنەماوە، دووەمیشیان بەمەبەستی دۆزینەوەی براکەی چووەتە ناو ئاوەکە و بە هەمانشێوە دیارنەماوە و خنکاوە.
