وەزارەتی دارایی هەرێم رایدەگەیەنێت، بڕی 598 ملیار دیناریان رادەستكراوە و دەشڵێت، حکومەت و وەزارەتی دارایی عێراق بەهیچ جۆرێک پابەندنەبوون بە رێکكەوتنی نێوان هەرێم و بەغداد.
دەقی راگەیەندراوەكە:
دوا نیوەڕۆی رۆژی چوارشەممە (2023/8/2) بڕی (598) ملیار دینار لەلایەن وەزارەتی دارایی عێراقەوە خرایەسەر هەژماری بانکیی وەزارەتی دارایی و ئابوریی هەرێمی کوردستان، ئەمڕۆ پێنجشەممە (2023/8/3) لە لقی هەولێری بانکی ناوەندیی عێراق، پارەکە رادەستی وەزارەتی دارایی هەرێم کرا و رەوانەی بانکەکان دەکرێت بە مەبەستی دابەشکردنی مووچە، هەر ئەمڕۆش دابەشکردنی مووچە بە وەزارەتی تەندروستی دەستپێدەکات و خشتەی سەرجەم وەزارەتەکانیش رادەگەیەنرێت و ئەو کورتهێنانەشی دروست بووە لە داهاتی ناوخۆ پڕدەکرێتەوە.
لە کاتێکدا هەرێمی کوردستان مانگانە پێویستی بە زیاتر لە 940 ملیار دینارە تەنها بۆ مووچە، ئەوە جگە لە خەرجیی بەکاربردن و دامودەزگاکان و بودجەی وەبەرهێنان و تێچووی بەرهەمهێنانی کارەبا.
بۆ هەموو لایەکی رووندەکەینەوە کە حکومەتی عێراقی فیدراڵ و وەزارەتی دارایی عێراق بەهیچ جۆرێک پابەندنەبوون بە رێکكەوتنی نێوان هەرێم و بەغداد و جێبەجێکردنی یاسای بودجەی عێراق.
ماف و شایستە داراییەکانی هەرێمی کوردستان بەپێی یاسای بوجە مانگانە زیاتر لە یەك ترلیۆن و 374 ملیار دینارە، تەنها بۆ مووچەی فەرمانبەران و خانەنشیان و پێشمەرگە مانگانە 906 ملیار دینار لە یاساکە تەرخانکراوە.
بەپێی ئینفاقی فیعلیش کە لە ئێستادا وەزارەتی دارایی عێراق لەسەر بنەمای تێکڕای خەرجی مانگانە کاری پێدەکات پێویست بوو یەك ترلیۆن و 174 ملیار دینار بۆ هەرێمی کوردستان رەوانە بکات، ئەو بڕە پارەیەی نێردراوە پێچەوانەی یاسای بودجە و هەموو ئەو رێکەوتنانەیە کە لەنێوان هەردوولا ئەنجامدراوە.
