سەرۆكی یەكێتی بڕیاری بەجینۆسایدناساندنی كۆمەڵكوژیی كوردانی ئێزدی لەلایەن حكومەتی بەریتانیاوە بەرزدەنرخێنێت و دەشڵێت، ئەركی هەمووانە پێكەوە مافەكانیان بپارێزین.
بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێكدا رایگەیاند، بڕیاری بەجینۆسایدناساندنی کۆمەڵکوژیی کوردانی ئێزدی لەلایەن حکومەتی بەریتانیاوە، هەنگاوێکی ئەرێنی و دڵخۆشکەرە بۆ زیاتر تیشک خستنەسەر ئەو تاوانانەی دەرحەق بە ئێزدییەکان و کورد بە گشتی ئەنجامدراوە.
هەروەك سوپاسی بێپایان ئاڕاستەی حکومەت و گەلی بەریتانیا دەکات لە بەرامبەر ئەو بڕیارە مێژووییەدا و دەڵێت، “هەوڵەکانیان لەپێناو چەسپاندنی دادپەروەری بەرزدەنرخێنین”.
سەرۆكی یەكێتی دووپاتیشیدەكاتەوە، لەسەر ئاستی کوردستانیش ئەرکی هەمووانە پێکەوە هەوڵەکان بۆ بەدەستهێنانی پشتگیریی کۆمەڵگەی نێودەوڵەتی بۆ بەجینۆسایدناساندنی ئەو تاوانانەی بەرامبەر گەلەکەمان ئەنجامدراوە چڕبکەینەوە و مافی کوردانی ئێزدی بپارێزین.
