وەزارەتی سامانە سروشتییەکان ئاشکرایدەکات لە ماوەیەکی کەمدا کێشەی گرانبوونی نرخی بەنزین چارەسەردەکەن.
وەزارەتی سامانە سروشتییەکان لە راگەیەندراوێکدا بڵاویکردەوە، “لە چەند رۆژی رابردوودا هەوڵەکان بۆ چارەسەركردنی كێشەی كەمیی بەنزین چڕکراونەتەوە و دوای رێگەپێدان لە 30ی تەمموز بۆ هاوردەکردنی بەنزین لەلایەن كۆمپانیاکانەوە، مانگانە 71 ملیۆن لیتر بەنزین بۆ ناو هەرێمی كوردستان هاوردە دەکرێت و لە ماوەیەكی زۆر كەمدا گرفتی كەمیی بەنزین چارەسەر دەكرێت”.
ئاماژەی بەوەشکرد، “بەهۆی ئەوەی حكومەتی عێراق لە 10 ی تەمموز پشكی هەرێمی كوردستانی لە پێدانی بەنزین بڕیوە، قەیرانی كەمیی خستنەڕووی بەنزینی لێکەوتووەتەوە، ئەمەش هاوكاتە لەگەڵ هەڵكشانی خواست لەسەر بەنزین”.
هەرێمی كوردستان رۆژانە پێویستیی بە 3 بۆ 3.5 ملیۆن لیتر بەنزین هەیە، دوای هاوردەکردنی بەنزین کێشەی کەمبوونەوەکەی روو لە چارەسەركردن دەكات.
