بەڕێوەبەرایەتیی ئۆپەراسیۆنەكانی دەزگای ئاسایش، بە هاوكاریی بەڕێوەبەرایەتیی ئاسایشی سلێمانی بكەرانی تاوانی كوشتنی هاوڵاتییەكی گەڕەكی سەرچناری سلێمانی دەستگیركرد.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، هێزەكانی ئاسایش دوای ئەنجامدانی لێكۆڵینەوە و بەدەستهێنانی زانیاریی وورد، بە بڕیاری دادوەری لێكۆڵینەوەی ئاسایش، ئەنجامدەرانی تاوانی كوشتنی هاوڵاتی ( سەمەد عارف محەمەد)ی تەمەن 41 ساڵیان دەستگیركرد، كە لە شەوی 6ی حوزەیرانی ئەمساڵدا لە ماڵەكەی خۆی لە گەڕەكی گردەبڕاوەكە بە چوار فیشەك كوژرا.
لە راگەیەندراوەكەدا هاتووە، دوای لێكۆڵینەوەی هێزەكانی ئاسایش، دەركەوت هاوژینی سەمەد بەرنامە داڕێژەری ئەم تاوانە بووە و بە هاوكاری دوو كەس ئەم تاوانەیان ئەنجامداوە، هۆكارەكەی دەگەڕێتەوە بۆ كێشەیەكی كۆمەڵایەتی و لە ئێستادا تۆمەتباران بە ماددەی 406 لە یاسای سزادان بە فەرمانی دادوەر ڕاگیراون.
