سەرۆكی یەكێتی لە دیداری محەمەد حەلبوسی رایدەگەیەنێت، پێویستە هەموومان هەوڵ بۆ تێپەڕاندنی بەربەستەکان بدەین.
بافڵ جەلال تاڵەبانی، سەرۆکی یەکێتیی نیشتمانیی کوردستان و محەمەد حەلبوسی، سەرۆکی ئەنجومەنی نوێنەرانی عێراق لە بەغداد کۆبوونەوە.
لە کۆبوونەوەکەدا دۆخی گشتیی وڵات و ئەرکەکانی ئەنجومەنی نوێنەران لەم قۆناغەدا گفتوگۆی لەبارەوە کرا و جەخت لە لێکتێگەیشتنی نێوان لایەنەکان کرایەوە بەتایبەت بۆ تێپەڕاندنی ئەو یاسایانەی رەهەندی نیشتمانیان هەیە و خزمەت بە بەرژەوەندییە گشتییەکان دەکەن.
بافڵ جەلال تاڵەبانی هەوڵ و پەرۆشیی یەکێتی بۆ کۆدەنگیی لایەنەکان و چڕکردنەوەی هەوڵەکان لەپێناو چارەسەرکردنی کێشەکان و گەیشتن بە ئەنجامێکی ئەرێنی دووپاتکردەوە و رایگەیاند، گەڕانەوە بۆ دەستوور و هاوبەشیی راستەقینە، فاکتەری سەرەکی سەقامگیریی وڵاتە.
وتیشی، “پێویستە هەموومان هەوڵ بۆ تێپەڕاندنی بەربەستەکان بدەین و بە ئاڕاستەی جێبەجێکردنی رێککەوتنە سیاسییەکان هەنگاوبنێین”.
كۆبوونەوەكە بە ئامادەبوونی رەفعەت عەبدوڵا، بڕیاردەری دەستەی کارگێڕی و دەرباز کۆسرەت رەسوڵ، کارگێڕی مەکتەبی سیاسی و سەعدی ئەحمەد پیرە، ئەندامی مەکتەبی سیاسیی یەكێتی بەڕێوەچوو.
