بەرپرسێکی هێزەکانی هەسەدە رایدەگەیەنێت، لێکۆڵینەوەکان ئاشکرایانکردووە ژنانی ناو کەمپی هۆل منداڵ و هەرزەکارە کوڕەکان بەکاردەهێنن هەر بۆیە بڕیاری جیاکردنەوەیان دراوە.
فەرهاد شامی بەڕێوەبەری نوسینگەی سوپای سوریای دیموکرات رایگەیاند، “لێکۆڵینەوەکان ئاشکرایانکردووە کە ژنانی داعش لە کەمپی هۆلدا منداڵان و هەرزەکارە کوڕەکان بۆ کاری سێکسی بەکاردەهێنن بۆ ئەوەی نەوەی نوێی داعش بخەنەوە”.
ئاماژەی بەوەشکرد، “هەر لەبەر ئەو هۆکارەیە لەیەکتر جیاکراونەتەوە و کوڕەکان براونەتە بنکەکانی چاکسازی بۆ دووبارە بونیادنانەوەی کەسایەتییان و سڕینەوەی بیری توندڕەوی لە مێشکیاندا”.
جیاکردنەوەی منداڵان لە دایکیان رەخنەی بەشێک لە چالاکوانانی مافی مرۆڤ و نەتەوەیەکگرتووەکانی لێکەوتووەتەوە، لای خۆیەوە فیۆنوالا نی ئاولین بڕیاردەری نەتەوە یەکگرتووەکان لە سوریا رایگەیاند، ئەوەی ئەنجامدراوە دوور لە یاساکانی مافی مرۆڤە و زیانی زۆری بەدەواوەیە و پێویستە چارەسەربکرێن.
