كۆمیتەی پەیوەندییەكانی كەجەكە راگەیەندراوێكی بڵاوكردەوە و دەڵێت، “شێروان شێروانی و هاوڕێكانی بارمتەی سیاسین لە دەستی پارتیدا”.
ئاماژەیا بۆ ئەوەش كرد، “لەم رۆژانەدا كە لە ساڵڕۆژی پەیمانی لۆزان نزیكدەبینەوە و داگیركەران لەژێر ناوی رێككەوتنی جیاوازدا دەیانەوێت بەردەوامی بە سیستمی لۆزان بدەن، پێویست دەكات كە گەلی كورد لە هەر چوار بەشی كوردستان و بە تایبەت هێز و لایەنە سیاسییەكانی سەرتاسەری كوردستان هەوڵی زیاتربدەن بۆ زیاتر لێكنزیكبوونەوە یەكگرتنی سیاسی و هەرچی پتەوتركردنی كۆمەڵگای كوردستان. لەم رووەوە بە تایبەت ئەرك دەكەوێتە سەرشانی دەسەڵاتی باشووری كوردستان كە بە رێزگرتن لە ماف و ئازادییە بنچینەییەكان رێگە لە بەردەم گەشەی كۆمەڵگە لە هەموو بوارەكاندا بكاتەوە، بەڵام بەداخەوە دەبینین كە پارتی بە قۆرخكردنی هەموو جۆمگەكانی دەسەڵات و سەپاندنی ویست و سیاسەتی خۆی بەسەر كۆمەڵگەدا كەشێكی مەترسیداری لە گرژی و ئاڵۆزی خولقاندووە.
لە راگەیەندراوەكەدا هاتووە، هەر دەنگێكی ناڕازیی لە باشووری كوردستانەوە لە دژی سیاسەتی گەندەڵی و دزی و بەكرێگیراوی بەرزببێتەوە پەدەكە هەوڵدەدات كپ و سەركوتی بكات و لەم چوارچێوەیەدا وەك لە نموونەی شەهید سەردەشت عوسمان و شەهید وەدات حسێندا دەبینرێت، سیاسەتی دەسەڵاتی پارتی لەم بوارەدا ئەشكەنجە و كوشتنە، بەڵام كۆمەڵگەی كوردی لە باشووری كوردستاندا كە خاوەنی دەیان ساڵ رەنج و قوربانییدانە لە دژی رژێمی فاشیستی بەعس مل بەم زەخت و گوشارانە نادات و هەموو دەرفەتێك بۆ دەربڕینی هەڵوێستی ئازادیخوازانەی خۆی بەكاردەهێنێت.
هەر لە راگەیەندراوەكەی كەجەكەدا هاتووە، پارتی كە ئارمەنجەكەی ئەوەیە كە كۆمەڵگەیەكی كۆیلە و گوێڕایەڵی دەسەڵات دروستبكات هەموو ئامرازەكانی دەسەڵات بۆ چەوساندنەوەی ئازادیخوازان و رەخنەگران بەكاردەهێنێت و چەند ساڵە كە پارتی بەدەیان كەسایەتی ئازادیخواز و چالاكوان و رۆژنامەنووسی لە بادینان بە بارمتەگرتووە و بە بەكارهێنانی دەزگاكانی وەكو پۆلیس و ئاسایش و دادوەری هەوڵدەدات كە گەل چاوترسێن بكات و وای لێبكات كە ئیرادەی خۆی رادەستی دەسەڵات بكات.
دەشڵێن، “زەخت و گوشار لەسەر بنەماڵە و هاوژینی ئەدهەم بارزانی هەموو ئاماژەی مەترسیدارن بۆ داهاتووی ماف و ئازادییە بنەڕەتییەكان لە باشووری كوردستاندا و بەتایبەتی، سەپاندنی چوارساڵی دیكە زیندان بە سەر رۆژنامەنووس شێروان شێروانی هیچ بنەمایەكی یاسایی نییە و نیشانەی ئەوەیە كە ماف و ئازادییەكان لە هەرێمی كوردستان لە پاشەكشێكی مەترسیداردایە و پارتی دەسەڵاتی دادوەریی هەرێم بۆ سەپاندنی نادادپەروەریی بەكاردەهێنێت، بڕیاری تاكەلایەنە و تاكەكەسی بە سەر دادگاكاندا دەسەپێنێت و مرۆڤە ئازادیخوازەكان بە تۆمەتی بێبنەما بە بارمتە دەگرێت. شێروان شێروانی و هاوڕێیەكانی بارمتەی سیاسین لە دەستی دەسەڵاتێكی حزبی لە پێناو سەپاندنی سیاسەتی بنەماڵەیی و بەكرێگیراوی بە سەر كۆمەڵگای باشوری كوردستاندا.
