لە سلێمانی دوو کەس بە تۆمەتی دزیکردن دەستگیرکران

پۆلیسی سلێمانی دەستگیرکردنی دوو کەسی راگەیاند کە دزیان لە هاوڵاتییەک کردبوو.

بەڕێوەبەرایەتیی پۆلیسی سلێمانی بڵاویکردەوە، “دوای ئەوەی هاوڵاتییەك سكاڵای تۆماركرد كە لە ماڵەكەی دزی لێكراوە و بڕی حەوت ملیۆن دینار ،حەوت هەزار و 100 دۆلار و 15 ملیۆن تمەنی لێدزراوە، مەفرەزەكانی نوسینگەی نەهێشتنی تاوانی كوردسات لێكۆڵینەوە و بەدواداچوونەكانیان دەستپێكرد و دوای وەرگرتنی بڕیاری دادوەر توانرا دوو تۆمەتبار دەستگیربكرێن”.

ئاماژەی بەوەشکرد، “لە كاتی دەستگیركردنی تۆمەتبارەکاندا دەستگیرا بەسەر چەكێكی جۆری دەمانچە و بڕێك لەو پارە دزراوەدا لەگەڵ ئۆتۆمبێلێك كە بە پارەی دزیكردنەكە كڕیبوویان”.

ئاشکراشیکرد، “لەئێستادا هەریەك لە تۆمەتباران د،ع،م لەدایكبووی 2002، ب،ح،أ لەدایكبووی 2000 بە بڕیاری دادوەر راگیراون و دانیان ناوە بە تاوانێكی تری دزیكردندا لەگەڕەكی كوردسات كە بڕی 45 ملیۆن دیناریان دزیبوو”.