بێگەرد تاڵەبانی وەزیری كشتوكاڵی هەرێم لە دیدارێكی تەلەفزیۆنیدا رایگەیاند، لە پلان و بەرنامەماندایە ئەمساڵ بەرهەمەكانی ترێ، هەنار و سێو و هەنگوین هەناردەی بازاڕەكانی دەرەوە بكەین.
وتیشی، “ئێمە ناتوانین هەموو بەرهەمێك هەناردەی دەرەوە بكەین و دەبێت پێویستیی ناوخۆ پڕبكاتەوە و تایبەتمەندییەكانی لەگەڵ خواستی دەرەوەدا بگونجێت و ئەوەش پێویستی بە راهێنانی جووتیاران هەیە”.
ئاشكراشیكرد، لە ماوەی دوو بۆ سێ ساڵی رابردوودا بەهەدەرچوونی رەنجی جووتیاران و فڕێدانی بەرهەمەكانیان لەسەر شەقامەكان زۆر كەمبووەتەوە بەو پێیەی ئێمە لەگەڵ عێراق یەك دەوڵەتین پێویستە بازاڕمان یەك بێت و ئەو بەرهەمانەی لە ناوخۆ زیادن لە بازاڕەكانی ناوەڕاست و باشووری عێراق ساغدەكرێنەوە.
