بەڕێوەبەرایەتیی ئۆپەراسیۆنەكانی دەزگای ئاسایش 64 هاوڵاتیی بیانی دەستگیردەكات بە رێگای نایاسایی سنوورەكانی هەرێمی كوردستانیان بەزاندووە.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای بەدەستهێنانی زانیاری و چاودێریكردن، بە فەرمانی دادوەری لێكۆڵینەوەی ئاسایش، هێزەكانی ئۆپەراسیۆنی دەزگای ئاسایش 16ی ئەم مانگە توانیان 64 هاوڵاتیی بیانی و شەش قاچاخچی و رێبەر دەستگیربكەن و دەستبگرن بەسەر ئۆتۆمبێلەكانیاندا.
لە راگەیەندراوەكەدا هاتووە، تۆمەتباران بەنیازبوون لە رێگای نایاساییەوە سنوورەكان ببەزێنن و كەسانی بیانی بهێننە ناو خاكی هەرێمی كوردستان لە پێناو بڕێك پارەدا.
ئاماژە بۆ ئەوەش كراوە، لە ئێستادا بە فەرمانی دادوەری لێكۆڵینەوە، سەرجەمیان راگیراون و لێكۆڵینەوە لە دۆسیەكانیان بەردەوامە.
