سەرۆكی لیژنەی نەوت و وزە لە ئەنجومەنی پارێزگای سلێمانی رایدەگەیەنێت، حكومەتی عێراق ساڵانە بەرنامە و پلانی بۆ دابەشكردنی نەوتی سپی بەسەر هاوڵاتییاندا هەیە و دەشڵێت، “بەپێی یاسای بودجە دەبێت بەرمیلێك نەوت بە 30 هەزار دینار بدرێتە هاوڵاتییانی هەرێم”.
كەریم عەلی سەرۆكی لیژنەی نەوت و وزە لە ئەنجومەنی پارێزگای سلێمانی لە لێدوانێكدا بە تۆڕی میدیایی ئێستای راگەیاند، حكومەتی عێراق ساڵانە بەرنامە و پلانی بۆ دابەشكردنی نەوتی سپی بەسەر هاوڵاتییاندا هەیە و ساڵانە لە مانگی ئەیلولەوە دەستبەدابەشكردنی نەوتی سپی لەسەر هاوڵاتییاندا دەكات تاوەكو مانگی نیسان.
ئاشكراشیكرد، ساڵانە حكومەتی عێراق بڕێك نەوتی سپی بۆ هەرێمی كوردستان دەنێرێت و ساڵی رابردوو یەك بەرمیل نەوت بە نرخی 105 هەزار دینار درایە هاوڵاتییان و بەپێی یاسای بودجە دەبێت حكومەتی عێراق یەك بەرمیل نەوتی سپی هاوشێوەی پارێزگاكانی ناوەڕاست و باشووری عێراق بە 30 هەزار دینار بدرێتە هاوڵاتییان و ئەوەش ئەركی پەرلەمانتارانی كوردە لە بەغداد بەدواداچوون بۆ ئەو بابەتە بكەن
