بەڕێوەبەرایەتیی گشتیی حەج و عەمرەی هەرێمی کوردستان رایگەیاند، ئەمڕۆ دووشەممە یەکەم کاروانی حاجییانی هەرێمی کوردستان لە سعودیەوە بەڕێدەکەون و دەگەڕێنەوە هەرێمی کوردستان.
بەپێی راگەیەندراوی بەڕێوەبەرایەتیی حەج و عەمرە، ئەو حاجییانەی ئەمڕۆ دەگەڕێنەوە، بەڕێگەی وشکانی دەگەڕێنەوە و ئێستا لە شاری مەککەوە بەرەو مەدینە بەڕێکەوتوون و دواتر دەگەڕێنەوە هەرێمی کوردستان.
پێشتر وەزارەتی ئەوقاف و کاروباری ئایینیی هەرێمی کوردستان رایگەیاند، لە 3ی تەمموزەوە گەڕانەوەی حاجیان بە رێگەی وشکانی دەستپێدەکات و لەرێگەی فڕۆکەخانەکانیشەوە لە 7 بۆ 11ی تەمموز گەڕانەوەیان دەستپێدەکات.
بەپێی ئاماری وەزارەتەکە، 690 حاجی بە رێگەی وشکانی دەگەڕێنەوە و سێ هەزار و 994 حاجیش بە رێگەی فڕۆکەخانەکان دەگەنەوە هەرێمی کوردستان.
