وەزارەتی تەندروستی رایدەگەیەنێت، لێكۆڵینەوە لە هۆكاری گیانلەدەستدانی ژنێك لە هەولێر دەكات كە كەسوكارەكەی هۆكاری مردنەكەی بۆ كەمتەرخەمیی پزیشكی دەگەڕێننەوە.
وەزارەتی تەندروستیی هەرێم راگەیەندراوێكی بڵاوكردەوە و تیایدا هاتووە، لەژێر رۆشنایی یاسای مافی نەخۆش ژمارە (4)ی ساڵی 2020 و پەیڕەوی لێکۆڵینەوە ژمارە (16)ی ساڵی 2022 بڕیاردرا بە پێکهێنانی لیژنەی لێکۆڵینەوە لەسەر کەیسی مردنی نەخۆشێک لە شاری هەولێر.
لیژنەكە بە چاودێری و ئامادەبوونی دادوەری نوێنەری داواکاری گشتی دەبێت و وەزارەتەكە دەڵێت، بۆ بەدواداچوونی زانستی، یاسایی و ئاشکراکردنی دەرەنجامەکانە بۆ رای گشتی.
قوربانییەكە ناوی (ژاڵە فاروق)ە، دوێنێ ئارام فاروق-ی برای بە تۆڕی میدیایی ئێستای راگەیاند، “خوشكەكەم هیچ گرفتێكی نەبوو دووگیان بوو، سەردانی نەخۆشخانەكەی كردبوو كە منداڵی ببێت، لە یەكێك لە نەخۆشخانە تایبەتەكان تووشی خوێنبەربوون بووە و پزیشكە تایبەتەكەی خۆی كە لە نەخۆشخانەكە بووە نەهاتووە بە هانایەوە و چەند جارێك پەیوەندیی پێوەكراوە”.
ئاماژەی بۆ ئەوەش كرد، چەند پزیشكێكی دیكەی راسپاردووە و وەك پێویست بە هانایەوە نەچوون و منداڵەكەی لەدایكبووە و خۆی گیانیلەدەستداوە.
