بەڕێوەبەرایەتیی هاتوچۆی هەولێر بڵاویکردەوە، بەرەبەیانی ئەمڕۆ رووداوێکی هاتوچۆدا لەسەر شەقامی 120 مەتری روویدا و بەهۆیەوە کەسێک گیانیلەدەستدا و چواری دیکەش برینداربوون.
بەڕێوەبەرایەتیی هاتوچۆی هەولێر بڵاویکردەوە، “کاتژمێر 1:30 خولەکی بەرەبەیانی ئەمڕۆ، لەسەر شەقامی 120 مەتری خێرا دوو ئۆتۆمبێل لە جۆری گۆڵفی تایبەت، کە هەریەکەیان شوفێر و سەرنشینێکی تێدابوو پێشبڕکێیان کردبوو لەنێوان خۆیاندا، لەوکاتەشدا ئۆتۆمبێلێکی تۆیۆتا کڕاون لەسەر شەقامەکە لە رێڕەوی خۆی رۆیشتووە، بەهۆی خێرایی زۆر و نەهێشتنەوەی ماوەی بێوەیی، یەکێک لە ئۆتۆمبێلەکان خۆی کێشاوە بە دواوەی ئۆتۆمبێلە کڕاونە تایبەتەکە و لەدەرەنجامی پێکدادانەکەدا کڕاونەکە گڕی گرتووە، گۆڵفەکەش دوبارە خۆی کێشاوەتەوە بەگۆڵفەکەی هاوڕێی”.
ئاماژەی بەوەشکرد، “لە دەرەنجامی رووداوەکەش شوفێری کڕاونەکە کە بێتاوان بوو لەناو ئۆتۆمبێلەکەی سوتاوە و گیانیلەدەستداوە، چوار کەسی دیکەش کە شوفێری هەردوو گۆڵف و سەرنشینەکانیان بوون بە سەختی برینداربوون”.
ئاشکراشیکرد، “هەر لە رووداوەکەدا زیان بەر سێ ئۆتۆمبێل و رێگاکەش کەوت ئاسەواری پێکدادانەکە، لە مەودای زیاتر لە 200 مەتر بڵاوبوونەتەوە، کە بەتەنیا ئەو ئاسەوارە پێمان دەڵێت خێراییەکان چەند بووە بەرلە رووداوەکە”.
