پۆلیسی سلێمانی دەستگیرکردنی تۆمەتبارێکی راگەیاند کە ھەڕەشەی بڵاوکردنەوەی وێنە و ڤیدیۆی تایبەتی لە کچێک کردبوو.
بەڕێوەبەرایەتیی پۆلیسی سلێمانی بڵاویکردەوە، “دوای تۆمارکردنی سکاڵای یاسایی لەسەر تۆمەتبارێک کە ھەڕەشەی بڵاوکردنەوەی وێنە و ڤیدیۆ تایبەتییەکانی لە کچێک کردبوو و بڕی ھەشت ھەزار دۆلار و بڕێک ئاڵتونی لەکچەکە سەندبوو، دەستبەجێ ھێزەکانی پۆلیس لێکۆڵینەوە و بەدواداچونیان بۆ دۆزینەوە و دەستگیرکردنی تۆمەتبار دەستپێکرد”.
ئاماژەی بەوەشکرد، ” دوای وەرگرتنی بڕیاری دادوەر، توانرا لە ماوەیەکی کەمدا تۆمەتبار بدۆزرێتەوە و لەلایەن مەفرەزەکانی بنکەی پۆلیسی زەڕایەنی سەر بەبەشی پۆلیسی شارەزوورەوە دەستگیربکرێت”.
ئاشکراشیکرد، ” تۆمەتبار دانی بەتاوانەکەیدا ناوە و پێشینەی تاوانی دیکەی ھەیە و دانی بەوەدا ناوە کە لەژێر ھەڕەشەی بڵاوکردنەوەی وێنە و ڤیدیۆی تایبەتیدا، پارەو ئاڵتونی لە چەند کچێکی دیکە سەندووە”.
لە ئێستادا تۆمەتبار (ھ، س، م) بە بڕیاری دادوەر و بەپێی ماددەی دوو لە یاسای خراپ بەکارھێنانی ئامێرەکانی پەیوەندیکردن راگیراوە و لێکۆڵینەوەکان بەردەوامە، ئەمەش وەک لە راگەیەندراوەکەی پۆلیسدا هاتووە.
