بڕیارە نیوەڕۆی ئەمڕۆ کۆبوونەوەی ئەنجومەنی نوێنەرانی عێراق ئەنجامبدرێت و دوای لە چەندین مانگ گفتوگۆکردن لەبارەیەوە دەنگ لەسەر پرۆژە یاسای بودجەی سێ ساڵی عێراق بدات.
بەپێی بەرنامەی کاری کۆبوونەوەی ئەنجومەنی نوێنەران، “کۆبوونەوەکە لە کاتژمێر 1:00 ی دوای نیوەڕۆ دەستپێدەکات و پرۆژە یاسای بودجە دەخرێتە دەنگدانەوە”.
پرۆژە یاسای ئەمجارەی بودجەی عێراق بۆ ساڵی ساڵی دارایی (2023، 2024، 2025) ە کە بە زیاتر لە 200 ترلیۆن دینار خەمڵێندراوە و بە گەورەترین بودجە لە مێژووی عێراق هەژماردەکرێت.
بەپێی ئەو زانیارییانەی بە تۆڕی میدیایی ئێستا گەیشتوون، تائێستا ماددەكانی 13 و 14ی پڕۆژە یاسای بودجەی عێراق تایبەت بە هەرێمی كوردستان بە تەواويی یەكلانەكراونەتەوە و ئەو بابەتەش قابیلی گفتوگۆكردنە، بەڵام هەوڵەكان بەو ئاراستەیە كە سبەی یاسای بودجە پەسەندبكرێت.
هەر بە پێی زانیارییەکان، پشووی پەرلەمان درێژكراوەتەوە و دەبێت پڕۆژەیاسای بودجە پەسەندبكرێت بەو پێیەی جەژنی قوربان نزیكە و لەگەڵ ئەوەشدا نیگەرانی شەقامی عێراقی لێدەكەوێتەوە ئەگەر یاسای بودجە پەسەند نەكرێت.
