لەلایەن هێزەكانی پۆلیسی سلێمانییەوە شەش تۆمەتبار دەستگیرکران کە بەنیازبوون لە یەکێک لە خوێندنگاکانی سلێمانی و لەکاتی تاقیکردنەوە گشتییەکاندا غەش (قۆپیە) بکەن.
بەڕێوەبەرایەتیی پۆلیسی پارێزگای سلێمانی رایگەیاند، دوای کۆکردنەوەی زانیاری و چاودێریکردنی چەند تۆمەتبارێک کە بەنیازبوون لە یەکێک لە خوێندنگاکانی شاری سلێمانی و لەڕێی ئامێری بێتەل و مۆبایلەوە لە تاقیکردنەوە گشتییەکاندا غەش بکەن، دوای وەرگرتنی بڕیاری دادوەر، توانرا شەش تۆمەتبار لەلایەن مەفرەزەکانی نوسینگەی نەھێشتنی تاوانی کوردسات بە ھاوکاری ھۆبەی جوڵانی نەھێشتنی تاوان دەستگیربکرێن.
لەکاتی دەستگیرکردنی تۆمەتباراندا دەستیشگیرا بەسەر چوار ئۆتۆمبێل و ژمارەیەک ئامێری بێتەل و مۆبایل و چەند کەلوپەلێکی تردا کە تۆمەتباران بەنیازبوون بۆ غەشکردن بەکاریبھێنن، وەك ئەوەی پۆلیسی سلێمانی ئاماژەی پێداوە.
دەشڵێت، لەئێستادا تۆمەتباران (د.ک.ع لەدایکبووی 1997، ج.ع.ح. لەدایکبووی 1996، ش.م.أ. لەدایکبووی 1981، ھ.د.م. لەدایکبووی 2002، ھ.إ.أ. لەدایکبووی 1998 و پ.خ.أ. لەدایکبووی 2004) بە بڕیاری دادوەر و بەپێی ماددەی 240 لە یاسای سزادان راگیراون و لێکۆڵینەوەکان بەردەوامە.
