لیژنەیەکی باڵای وەزارەتی تەندروستیی عێراق و رێکخراوی تەندروستیی جیهانی بە مەبەستی بەدواداچوون بۆ دۆخی بڵاوبوونەوەی تای خوێنبەربوون لە عێراق سەردانی پارێزگای زیقاریان کرد.
ئامانج لە سەردانەکە کۆنترۆڵکردنی بڵاوبوونەوەی تای خوێنبەربوونە و جەختکردنەوەیە لە پێویستیی هاوکاریی هەموو لایەنە پەیوەندیدارەکان بۆ ڕێگریکردن لە بڵاوبوونەوەی نەخۆشییەکە.
بەرپرسی راگەیاندنی وەزارەتی تەندروستیی عێراق، ئاماژەی بەوەکرد، تیمەکانی سەر بە وەزارەتی تەندروستی بەردەوامن لە ئەنجامدانی پشکنین بۆ قەسابخانەکان بۆ بەدواداچوون بۆ رادەی پابەندبوونی قەسابەکان بە مەرج و رێنماییە تەندروستییەکان، هەروەها بۆ هۆشیارکردنەوەیان لەسەر گرنگی پاکوخاوێنی کەسی، پاکوخاوێنی دوکانەکانیان و ئەو کەرەستانەی کە لە سەربڕین و بڕینی گۆشتدا بەکاردەهێنرێن بۆ سنووردارکردنی بڵاوبوونەوەی نەخۆشییەکە و کۆنترۆڵکردنی.
