عەبدوڵا مەلا نوری، ئەندامی خولی پێشووتری پەرلەمانی كوردستان لە پەڕەی تایبەتی خۆی لە تۆڕی كۆمەڵایەتیی فەیسبووك پەیامێكی ئاراستەی جوڵانەوەی نەوەی نوێ كردووە دەڵێت، “لەم خولەی پەرلەماندا پەرلەمانتارانی یەكگرتوو پێش هەمووان، دواتر سەربەخۆكان و كۆمەڵ دەستیان لەكاركێشایەوە و برادەرانی نەوەی نوێ تا دوێنێش پێش دەرچوونی بڕیارەكەی دادگای فیدراڵی، هەر پەرلەمانتاربوون و دەستیان لەكارنەكێشایەوە و ئێستاش بە شێوەیەك قسەدەكەن وەك ئەوەی پێشتر كەسی تر هیچی نەكردبێت، هەمووان ترسنۆك دۆڕاوبن و تەنها نەوەی نوێ نوێ شتی كردبێت”.
عەبدوڵای مەلا نوری نووسیویەتی، “رێگای راست ئەوەیە هاوتەریب لەگەڵ هەوڵەكانی خۆتاندا، هەوڵ و ماندووبونی ئەوانی تریش لەبەرچاو بگرن. كاتی خۆی گۆڕان كە دروستبوو، بەرهەمی پێكەوەگرێدانی خەباتی چەندین ساڵ رەخنەی نووسەران و میدیای ئازادی وەك رۆژنامەی هاوڵاتی و ئاوێنە و لڤین و تێكۆشانی كۆمەڵێك سیاسی ئازا و خاوەن روئیا بوو، ئەگەر ئێوە بتانەوێت رێزلێگیراوبن و وەك جەستەیەكی نامۆی بێزراو تەماشا نەكرێن و توانای بەردەوامیتان هەبێت، ئەوا دەبێت بابەتییانە و راستگۆییانە وێنەكە وەك خۆی ببینن، نەك وەك ئەوەی كە خۆتان دەتانەوێت هەموو راستییەكان دەشێوێنن، كورت و پوخت ئێوە پەیڕەوی سیاسەتی درۆ بكە درۆ بكە تا خەڵك بڕوا دەكەن”.
