ماوریسیۆ پۆچیتینۆی ئەرجەنتینی و ڕاهێنەری پێسووی پاریس سان جێرمان و تۆتنهام، ڕێککەوتنی کۆتایی لەگەڵ یانەی چێڵسی ئینگلیزی-دا کردووە.
بەپێی زانیارییەکانی فابریزیۆ ڕۆمانۆی شارەزای بواری گواستنەوەکان، ماوریسیۆ پۆچیتینۆ و بەرپرسانی یانەی چێڵسی گەیشتوون بە ڕێککەوتنی کۆتایی، هەفتەی داهاتووش بە فەرمی گرێبەستەکەی ئاشکرادەکرێت.
ڕۆمانۆ ئەوەشی دەرخستووە، کە گرێبەستی نێوان چێڵسی و “پۆچی” تاوەکو 2026 درێژەی دەبێت، لەو ماوەیەشدا چەندین گواستنەوەی گەورە و یاریزانی داواکراوی بۆ دابین دەکرێت.
چێڵسی لەم وەرزەدا بەهۆی خراپی ئەنجامەکانەوە گراهام پۆتەری ڕاهێنەری لە پۆستەکەی دوورخستەوە، بەشێوەیەکی کاتی فرانک لامپارد لە جێگەی دەستبەکاربوو، بەڵام شکستیانهێنا لە گەیشتن بە چامپیۆنزلیگی وەرزی داهاتوو.
“ESPN” نووسیویەتی، پۆچیتینۆ لیستی یاریزانی ناپێویست و لە هەمان کاتدا یاریزانە داواکراوەکانی پێشکەشی ئیدارەی تۆد بۆیلی کردووە، ئەوانیش ڕەزامەندییان لەسەر نیشانداوە.
