پرۆسەی تاپۆکردنی خانوو لە گەڕەکی کەلاری کۆن، كە بە كۆنترین گەڕەكی شاری کەلار دادەنرێت دەستیپێکرد.
بەگوێرەی پێگەی ئیدارەی گەرمیان، ئەکرەم ڕەزا، بەڕێوبەری تۆماری خانووبەرەی گەرمیان ڕایگەیاندووە، “پاش ماوەیەکی زۆر و بە گرتنەبەری ڕێکارە یاساییەکان لەو بەشەی کەلاری کۆن کە پێشتر گوند بووە و ڕووبەرەکەی 83 دۆنمە، تاپۆکردن دەستیپێکرد و خانووی دوو ھاوڵاتی تاپۆ کران”.
بەڕێوبەری تۆماری خانووبەرەی گەرمیان ئاماژەی بەوەشكرد، “دەستپێکردنی پرۆسەی تاپۆی کەلاری کۆن پاش جێبەجێکردنی سەرجەم ڕێکارە یاساییەکان دێت لەلایەن بەڕێوبەرایەتیی تاپۆی گەرمیان و لیژنەی چەسپاندنی موڵکیەت”.
ئەکرەم ڕەزا ئاشكراشیكردووە، ھاوڵاتییانی دیکەی دانیشتووانی ئەو بەشەی کەلاری کۆن کە ڕووبەرەکەی 83 دۆنمە، بەھەمان شێوەی ئەو دوو خانووە دەتوانن ڕێکارە یاساییەکان بگرنەبەر بۆ تاپۆکردنی خانووەکانیان.
كەلاری كۆن، كۆنترین گەڕەكی كەلارە و سەرەتا گوند بووە و دواتر پاش بە قەزا بوونی كەلار، وەك گەڕەكێك كە بە گەڕەكی دایك ناو دەبرێت دانراوە.
