دوای دانانی باج لەسەر كارتی مۆبایل لە پرۆژەیاسای بودجەدا پەرلەمانتارێكی كورد دەڵێت، لە بەرژەوەندیی خەڵكی كەمدەرامەت نییە و رەتیدەكەینەوە.
کاروان یاروەیس، ئەندامی لیژنەی پەیوەندییەكان و گواستنەوەی ئەنجومەنی نوێنەرانی عێراق بە تۆڕی میدیایی ئێستای راگەیاند، پێشتر بە هەوڵی لیژنەکەیان و بە بڕیاری وەزارەتی پەیوەندییەكان توانرا باجی 20%ی سەر کارتی باڵانسی مۆبایل لاببرێت، بەڵام جارێكی دیكە لە پرۆژەیاسای بودجەی گشتیدا ئەو باجە دانراوەتەوە.
بەپێی پرۆژەكە باجی سەر كارتی مۆبایل بە رێژەی 10% دانراوە، وەك ئەوەی یاروەیس ئاماژەی پێدا و وتی، “لە بەرژەوەندیی خەڵکی کەمدرامەت نییە”.
دانانی ئەو بڕگەیەی باج لە پرۆژەیاسای بودجە بەمەبەستی زیادكردنی داهاتی حكومەت و كەمكردنەوەی قەرزەكانیەتی، ئەو پەرلەمانتارە پێیوایە دەتوانرێت لەڕێی وەرگرتنەوەی ئەو ملیۆنان دۆلارەی لەسەر کۆمپانیاکانی پەیوەندیکردن كۆبووەتەوە و گەڕاندنەوەی بۆ خەزێنەی حكومەت چارەسەری كەمی داهات بكرێت.
داواشی لە سەرجەم پەرلەمانتاران كرد لەكاتی خستنە دەنگدانی پرۆژەكەدا دەنگ بەو مادەیە نەدەن تا نرخی کارتی بالانسی مۆبایل وەکخۆی بمێنێتەوە.
