شارەزایەكی بواری نەوت دەڵێت، كۆمپانیای بۆتاش-ی توركی داواكاریی كۆمپانیای نەوتی نیشتمانیی (سۆمۆ) بۆ سەرلەنوێ هەناردەی نەوتی هەرێم لەڕێی بەندەری جەیهانەوە رەتدەكاتەوە.
بەهجەت ئەحمەد، شارەزای عێراقی لە بواری نەوت رایگەیاند، كۆمپانیای بۆتاش داواكاری سۆمۆ بۆ سەرلەنوێ هەناردەی نەوتی هەرێم رەتدەكاتەوە، بە بیانووی بوونی كێشەی هونەری لە بۆریی گواستنەوەی نەوت.
ئەحمەد لە لێدوانێكدا وتیشی، “پێویستی وەزارەتی نەوت و (سۆمۆ) بەدوای شوێنگرەوەدا بگەڕێن بۆ سوودوەرگرتن لە نەوتی هەرێمی كوردستان، چونكە بەردەوامیی ئەم بەهەدەردانە رۆژانەیە مانای زیانی گەورەیە كە بە 40 ملیۆن دۆلاری رۆژانە دەخەمڵێندرێت”.
تائێستا عێراق چاوەڕوانی “رێككەوتنی كۆتاییە” لەگەڵ توركیا بۆ دەستكردنەوە بە هەناردەی نەوتی هەرێم، وەك ئەوەی پێشتر حكومەتی هەرێم رایگەیاند، پاش زیاتر لە مانگێك بەسەر وەستاندنی.
