قوباد تاڵەبانی جێگری سەرۆکی حکومەتی هەرێمی کوردستان بەبۆنەی یادی دامەزراندنی یەکێتیی مامۆستایانەوە پیرۆزباییان ئاراستە دەکات و جەختدەکاتەوە لەم قۆناغەدا ئەرکی مامۆستایان زۆر قورسترە.
قاباد تاڵەبانی رایگەیاندووە، “بەبۆنەی یادی دامەزراندنی یەکێتیی مامۆستایانی کوردستانەوە گەرمترین پیرۆزبایی ئاڕاستەی ئێوە و هەموو مامۆستایانی کوردستان دەکەم”.
لە پەیامەکەیدا دەڵێت، “یەکێتی مامۆستایان خاوەنی مێژوویەکی پڕ لە شانازییە، چ وەک بەشداریکردن و رۆڵی گرنگی لە خەباتی رزگاریخوازانەی گەلەکەماندا و چ وەک ئەرکی پیشەیی خۆی لە پەروەردەکردنی چەندین نەوە و داکۆکیکردن لە مافی مامۆستایاندا”.
ئاماژە بۆ ئەوە دەکات کە ئەرکی یەکێتیی مامۆستایان لەم قۆناغەدا قورسترە لە هەر قۆناغێکی دیکە، بەوپێیەی داهاتووی وڵاتەکەمان بەندە بە پەروەردەکردنی نەوەیەکی زانستخوازی نیشتمانپەرەوەر و بۆ ئەمەش پێویستە یەکێتیی مامۆستایان رۆڵی کارا ببینێت لە پێداچوونەوە بە سیستمی پەروەردە و گەشەپێدانی زیاتری پەروەردەی کوردستان.
