بەشێک لە دەرچووانی زانكۆ و پەیمانگەكانی هەرێمی كوردستان، بە هەوڵی فراكسیۆنی یەكێتی لە بەغداد و بە بڕیاری محەمەد شیاع سودانی سەرۆك وەزیرانی عێراق دادەمەزرێندرێن.
ئەو كەسانەی بڕیارەكە دەیانگرێتەوە، بریتین لە دەرچووە یەكەمەكانی زانكۆ و پەیمانگەكانی هەرێمی كوردستان، لەسەر داوای فراكسیۆنی ی. ن. ك لە ئەنجومەنی نوێنەران، لەلایەن حكومەتی ناوەندییەوە بەپێی پسپۆڕییەكانیان دادەمەزرێندرێن و میلاك و مووچەكانیان سەر بە بەغداد دەبن.
لەو بارەیەوە د. نەرمین مەعروف ئەندامی لیژنەی دارایی لە ئەنجومەنی نوێنەران كە ئەندامی فراكسیۆنی یەكێتییە بە ئێستای راگەیاند، دوای ئەوەی بە نووسراوی فەرمی و رووبەڕووش لە كۆبوونەوەی مانگی رابردووی لیژنەكەیاندا لەگەڵ محەمەد شیاع سودانی سەرۆك وەزیراندا، داوای دامەزراندنی یەكەمەكانی زانكۆ و پەیمانگەكانی هەرێمی كوردستانیان كردووە، سودانی داواكەی پەسەندكردووە.
وتیشی، “لە كۆبوونەوەی درەنگانی شەوی رابردووی لیژنەی دارایی لەگەڵ وەزیری دارایی عێراقدا، جارێكی دیكە لەبارەی ئەو پرسەوە لە وەزیرم پرسی و بە ئامادەبوونی سەرۆك و هەموو ئەندامانی لیژنەی دارایی، وەزیر دڵنیایی دا لەوەی دەرچووە یەكەمەكانی زانكۆ و پەیمانگەكانی هەرێمی كوردستان دادەمەزرێندرێن”.
