یەكەمین كۆنفرانسی نێودەوڵەتی ئەكادیمی و زانستیی هەورامانناسی لە زانكۆی كوردستان لە شاری سنەی رۆژهەڵاتی كوردستان بەرێوەچوو، كە بە هاوبەشی لەلایەن هەرسێ زانكۆی كوردستان/ سنە، زانكۆی سلێمانی و زانكۆی هەڵەبجە رێكخرابوو.
كۆنفرانسەكە لە رۆژانی 3 و 4 ی ئایاری 2023 بەڕێوەچوو، كە مامۆستایانی زانكۆی هەڵەبجە بە چەند توێژینەوەیەكی تایبەت لەبارەی هەورامانەوە بەشدارییان كردبوو، ئەمە جگە لە پێشكەشكردنی وتارێكی تایبەت لەلایەن د. مەهاباد كامیل عەبدوڵا سەرۆكی زانكۆی هەڵەبجە و بەشداریی شاندێكی زانكۆكە لە كۆنفرانسەكەدا.
زانكۆی كوردستان/ سنە، زانكۆی سلێمانی، زانكۆی هەڵەبجە لە چوارچێوەی هەوڵە زانستییەكانیاندا كۆنفرانسە زانستییەكەیان بۆ ناساندنی هەورامان لەبوارە زانستی و كەلتووری و كۆمەڵایەتی و هونەرییە جیاوازەكاندا كۆنفرانسەكەیان رێكخستبوو، كە لەماوەی دوو ڕۆژی كۆنفرانسدا بە 22 پانێڵ 93 توێژینەوە لەو بوارانە پێشكەشكرا.
