بڕیارە ئەنجومەنی نوێنەرانی عێراق لە دانیشتنی ئەمڕۆیدا رۆژی نیشتمانی دیاریبكات.
ئەنجومەنەكە ئەمڕۆ بە ئامادەبوونی 175 پەرلەمانتار دەستی بە دانیشتنی ئاسایی خۆیكرد.
كاروان یاروەیس، ئەندامی ئەنجومەنی نوێنەران لە فراكسیۆنی یەكێتی بە تۆڕی میدیایی ئێستای راگەیاند، لە دانیشتنەكەدا دەنگ لەسەر پرۆژەیاسای جەژنی نیشتمانیی عێراق دەدرێت كە رۆژی 3ی تشرینی یەكەم بۆ ئەو رۆژە دیاریكراوە.
هەر بەپێی پرۆژەیاساكە بڕیاری ژمارە 886ی ئەنجومەنی سەركردایەتی شۆڕش (بەعس)ی ساڵی 1979 و بڕیاری پەرلەمانیی ژمراە 25ی ساڵی 2005 و بڕیاری ژمارە 1ی ئەنجومەنی حوکم هەڵدەوەشێندرێتەوە، وەك ئەوەی یاروەیس ئاماژەی پێدا.
لە بەشێكی دیكەی دانیشتنەكەی ئەمڕۆدا بڕیارە خوێندنەوەی دووەم و گفتوگۆ لەبارەی هەمواری یەکەمی یاسای کۆمپانیا ئەمنییە تایبەتەکان بكرێت.
لە رۆژی 3ی تشرینی یەكەمی ساڵی 1932 ئەنجومەنی گشتیی کۆمەڵەی گەلان داوای عێراقی بۆ ئەندامبوون لە كۆمەڵەكە پەسەندكرد.
