جێگری سەرۆك وەزیران رایدەگەیەنێت، ستراتیژی ئێمە بەکارهێنانی وزەی گازە بۆ دابینکردنی کارەبای 24 کاتژمێری بۆ هاوڵاتییان و پڕکردنەوەی پێویستییەکانی ناوخۆ، پاش ئەوە دەتوانین بیر لە هەناردەکردنی گاز بکەینەوە.
قوباد تاڵەبانی جێگری سەرۆک وەزیران ئەمڕۆ بەشداری لە پانێڵکی دیداری عێراق بۆ سەقامگیری و خۆشگوزەرانی لە بەغداد و سەبارەت بە وزەی گاز رایگەیاند، پێویستە ستراتیژی نوێ بەکاربهێنن چ بۆ بەکارهێنانی لە ناوخۆ و چ بۆ هەناردەکردنیشی لە داهاتوودا. بۆ ئەمەش لەم قۆناغەدا پێویستیمان بە پەرەپێدان و پێشخستنی زیاتری کێڵگەکانی گازە بۆ ئەوەی بتوانین پێویستییەکانی ناوخۆ دابینبکەین چ بۆ وێستگەکانی بەرهەمهێنانی کارەبا و چ بۆ کارگەکانی پیشەسازی و دابینکردنی پێویستییەکانی ماڵان.
سەبارەت بە یاسای نەوت و گازیش قوباد تاڵەبانی وتی، “رێککەوتنی کۆتایی نێوان هەرێم و بەغداد لەسەر دەستپێکردنی هەناردەکردنەوەی نەوت، زەمینەیەکی باشی بۆ رێککەوتن لەسەر یاسای نەوت و گاز رەخساندووە”. جەختیشیکردەوە کە لەم قۆناغەدا لە هەمووی گرنگتر تێپەڕاندنی یاسای نەوت و گازە بەشێوەیەک کە یاسایەکی واقیعی بێت و رۆڵ و پێگەی هەموو لایەکی تێدا بە روونی دەستنیشان کردبێت و لەسەر ئەرزی واقیعیش توانای جێبەجێکردنی هەبێت.
جێگری سەرۆك وەزیران روونیشیکردەوە، گرنگ نییە کێ نەوت دەفرۆشێت، بەڵکو گرنگ ئەوەیە داهاتی زیاتر دەستبکەوێت و ئەو داهاتە بە شێوەیەکی شەفاف و دادپەروەرانە دابەشبکرێت، هەروەها پلانیش هەبێت کە بەشێکی گرنگی ئەو داهاتەش بۆ وەبەرهێنان و گەشەپێدانی ئابوری و دروستکردنی هەلی کار بۆ هاوڵاتییان تەرخان بکرێت.
سەبارەت بە دۆخی سلێمانیش جێگری سەرۆک وەزیران ئاماژەی بەوەدا، دۆخی سلێمانی باش نییە، هاوڵاتییان دڵخۆش نین و ناڕازین لە شێوازی دابەشکردنی نادادپەروەرانەی داهات و وتی، “لە دوای تێپەڕاندنی یاسای بودجە لە پەرلەمانی عێراق، کاردەکەن بۆ ئەوەی هەرێمی کوردستانیش دوای نزیکەی 10 ساڵ ببێتە خاوەنی یاسای بودجەی خۆی بەجۆرێک کە داهاتەکان بەشێوەیەکی شەفاف و دادپەروەرانە و بەبێ جیاوازی و مەبەستی سیاسی بەسەر هەموو هاوڵاتییان و شار و شارۆچکەکاندا دابەشبکرێت”.
