پەرلەمانی بەریتانیا یاسایەکی نوێی پەیوەندیدار بە کۆچبەرانەوە پەسەندکرد، کە قەدەغەی چوونە ناوەوەی کۆچبەران دەکات بۆ ئەو وڵاتە لەرێگەی کەناڵی ئینگلیزەوە.
یاساکە پێشتر مشتومڕی زۆر لەسەر بووە و چەند جارێک لەلایەن پەرلەمانتارە ناڕازییەکانەوە هەموارکراوەتەوە.
ئەنجومەنی نوێنەرانی بەریتانیا بە 289 دەنگی بەڵێ بەرامبەر 230 دەنگی نەخێر، دوای خوێندنەوەی سیێەمی پرۆژەیاساکە پەسەندیکرد، قۆناغی دوای ئەمە یاساکە دەچێتە ئەنجومەنی لۆردەکان و لەوێدا دەتوانرێت هەمواربکرێتەوە یان دوابخرێت.
یاساکە دەڵێت، رێگەنادرێت هیچ کۆچبەرێک لەڕێگەی کەناڵی ئینگلیزەوە بە نایاسایی بچێتە بەریتانیاوە، هەر کۆچبەرێکیش بچێتە ئەو وڵاتەوە لەو رێگەیەوە، ئەوا یان دیپۆرتی وڵاتەکەی خۆی دەکرێتەوە، یان دەنێردرێت بۆ وڵاتی سێیەم بەمەرجێک وڵاتێکی سەلامەت بێت.
ڕۆبێرت جێنریک، وەزیری کۆچبەران پێش دەنگدانەکە لە پەرلەمانی بەریتانیا وتی، “کۆچی نایاسایی یەکپارچەیی سیستەمی کۆچبەریمان تێکدەدات، هەر بۆیە دەمانەوێت بەلەمەکان بوەستێنین و سنوورەکانمان پارێزراو بکەین، ئەم پڕۆژە یاسایەش تایبەتە بەو ئامانجە”.
