لیژنە هاوبەشەکانی قائیمقامیەتی سلێمانی روو لە هاوڵاتییان دەڵێت، “تکایە خۆتان لە خواردنی سەر عەرەبانەکان بپارێزن”.
لە یەکەم رۆژی جەژنی رەمەزاندا و هاوكاتی بەرپاكردنی هەڵمەتی لیژنە هاوبەشەکانی قائیمقامیەتی سلێمانی بە بەشداریی چاودێریی بازرگانی و گەشتوگوزاری سلێمانی بۆ چێشتخانە و خواردنگە و عەرەبانەکانی سەنتەری سلێمانی، دەستگیرا بەسەر بڕێک خۆراکی نەشیاودا و چەند شوێنێک داخران، وەك رێکان جەمال سەرۆکی لیژنە هاوبەشەکانی قائیمقامیەتی سلێمانی ئاشكرایكردووە.
سەرۆکی لیژنە هاوبەشەکان دەڵێت، “لە هەڵمەتەکەدا دەستگیراوە بەسەر هەموو ئەو تەنوری غازانەی کە لەفە فرۆشەکان نانیان پێدەکەن و سەرجەمیان ژەنگاوی بوون و بە هیچ جۆرێک شیاونەبوون، چەند فرۆشیارێکی لەفەی سەر عەرەبانەش سەرەڕای ئەوەی هیچ مەرجێکی تەندروستییان تێدا نەبوو لەرووی ئەو ئامێر و شمەکانەی کە بەکاریاندەهێنن، خواردنی رۆژانی پێشوویان لەناو عارەبانەکاندا هەڵگرتبوو بۆ ئەوەی بیفرۆشنەوە بە هاوڵاتییان”.
رێکان جەمال تکا لە هاوڵاتییان دەکات خۆیان لە خواردنی سەر عەرەبانەکان بپارێزن و راشیگەیاند، “لە رۆژانی پشووی جەژنیشدا هەڵمەتی لیژنەکان بەردەوامدەبن”.
