بەڕێوبەری کۆمپانیای هەناری کوردستان ڕایدەگەیەنێت، کاتێک دەیانەوێت بەناوی کوردییەوە هەنار هەناردەی ئەوروپا بکەن، تورکیا کێشەی لەگەڵ ناوە کوردییەکاندا هەیە و بە ئاسانی ڕێگەنادەن بە ناوی کوردییەوە هەنارەکە ڕەوانە بکرێت.
فەرەیدون نامدار، بەڕێوبەری کۆمپانیای هەناری کوردستان، لە لێدوانێکی ڕۆژنامەوانیدا ڕایگەیاندووە، “پێشتر هەناری هەڵەبجە و کوردستان کاتێک ڕەوانەی ئەوروپا دەکرا بەناوی کوردیەوە، لە فڕۆکەخانەکانی تورکیا و ئێران کێشە بۆ ناوە کوردییەکان دروست دەکرا و هەندێکجار دەشگۆڕا”.
کۆمپانیای هەناری کوردستان ئەرکی هەناردەکردنی هەناری هەڵەبجە و هەرێمی لە ئەستۆگرتووە و تا ئیستا بە چەندین ولاتی ئەوروپی و بەریتانیادا هەناری کوردستانی بڵاوکردووەتەوە.
وەک بەڕێوبەری کۆمپانیای هەناری کوردستان دەڵێت، بە نیازن لە ئایندەیەکی نزیکدا هەناری هەرێم بدەنە دەست پەرلەمانتار و سیاسییەکانی ئەوروپا تا لەو ڕێگەوە ئەم میوەیە کە هەرێم دەوڵەمەندە پێی بە ئەوروپا بناسێندرێت.
دوای وڵاتی بەریتانیا ئەمڕۆ 17 ی کانونی یەکەم، 21 تۆن هەناری هەڵەبجە و کوردستان گەیەنراوەتە وڵاتی سوید و ئێستا کوردان و دانیشتوانی ئەو شارە دەتوانن تامی هەناری هەڵەبجە و کوردستان بکەن.
