سەندیكای پارێزەران ئیدانەی پەلاماردانی پارێزەرێك لەلایەن چەند چەكدارێكەوە لە هەولێر دەكات و رایدەگەیەنێت، لەپاڵ پارێزەری سكاڵاكار، سكاڵای خۆیان دژی ئەنجامدەرانی تاوانەكە تۆماردەكەن.
شەوی رابردوو لەلایەن ژمارەیەك چەكدارەوە محەمەد یابە سۆفی پارێزەری راوێژكار لە هەولێر رفێندرا و بۆ ماوەی سێ كاتژمێر رووبەڕووی ئەشكەنجە و لێدان بووەوە، بەر لەوەی لەلایەن رفێنەرانەوە بە هەڕەشە و مەرجی تۆمارنەكردنی سكاڵا ئازادبكرێت.
سەندیكای پارێزەرانی كوردستان راگەیەندراوێكی لەبارەی رووداوەكەوە بڵاوكردەوە و رایگەیاند، ئەو پارێزەرە تەنها لەپێناو پاراستنی مافە یاسایی و مرۆییەكانی بریكاردا كاری پیشەیی خۆی ئەنجامداوە و داكۆكی لە مافی بریكار كردووە.
دەشڵێت، “بەپێی ماددەی 22ی یاسای پارێزەرایەتی (هێرشكردنەسەر پارێزەر وەك هێرشكردنەسەر دادوەر)ە و وەك پێشێلكردن و دەستدرێژیكردنەسەر دامودەزگا یاساییەكانی هەرێمی كوردستان هەژمار دەكرێت”.
سەندیكای پارێزەران دووپاتیشیدەكاتەوە، لەپاڵ پارێزەری سكاڵاكار، سكاڵای خۆیان دژی ئەنجامدەرانی تاوانەكە تۆماردەكەن.
