وەزارەتی دارایی هەرێم رایدەگەیەنێت، بەهۆی فێڵكردن و خۆدزینەوە لە باج زیاتر لە 11 هەزار كۆمپانیا و باجدەر سزا دراون.
بەپێی راگەیاندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، كەمال تەیب بەڕێوەبەری گشتی باجەكان رایگەیاند، ئەو شوێنانەی سزادراون فێڵیان لەحكومەت كردووە و خۆیان لەباجدان دزیوەتەوە و بە پێی ئاماری بەڕێوەبەرایەتيی گشتیی باجەكان لە وەزارەتی دارایی و ئابوریی هەرێم، لە ماوەی چوار ساڵدا 11 هەزار و 594 كۆمپانیا و كۆمپانیا و باجدەر بەهۆی فێڵكردن و خۆدزینەوە لە باج سزا دراون و رووبەڕووی رێكاری یاسایی كراونەتەوە.
بەڕێوەبەری گشتیی باجەكان لە وەزارەتی دارایی و ئابوری رایگەیاند، ئەو كۆمپانیا و شوێن و باجدەرانەی سزادراون لە ژمێرەی ساڵانەیان فێڵیان لە حكومەت كردووە و خۆیان لە باجدان دزیوەتەوە لە كاتێكدا بەپێی یاسا پێویست بووە باج بدەنە حكومەت.
وتیشی، “ئەوانەی سزادراون ئەو شوێن و كەسانەی نەگرتووەتەوە كە داهاتیان نزمە و كار و پیشەكەیان سنووردارە”.
هەر بەپێی ئامارەكان لەو ماوەیەدا 747 شوێن داخراون و 103 باجدەر ئاراستەی دادگا كراون بەهۆی ساختەكاری و سەرپێچی یاسایی لە باجداندا و قەدەغەی گەشتكردن لەسەر 72 باجدەر دانراوە.
لە بەشێكی ئامارەكەدا هاتووە بەهۆی پێشكەشنەكردنی میزانیە لە ماوەی یاسایدا 2244 سزای دارایی دراون و 7135 نامەی ئاگاداركردنەوە ئاراستەی باجدەران كراوە و 1263 كۆمپانیا و باجدەریش بەهۆی قەرزاری باجەوە نیشانەی گلدانەوە لەسەر دۆسیەكانیان دانراوە.
