قوباد تاڵەبانی جێگری سەرۆك وەزیران پێشوازیكرد لە رۆزی كەیڤ كونسوڵی گشتیی بەریتانیا لە هەرێمی كوردستان و لە كۆبوونەوەی نێوانیاندا تاوتوێی دۆخی سیاسیی هەرێمی كوردستان و عێراق كرا.
لە بەشێكی كۆبوونەوەكەدا كە رۆژی چوارشەمە بەڕێوەچوو گفتوگۆ لەسەر كێشەی وەستانی بەشێك لە گەشتەكانی فڕۆكەخانەی نێودەوڵەتیی سلێمانی كرا و لەمبارەیەوە قوباد تاڵەبانی ناوەڕۆكی كێشەكەی بۆ كونسوڵی گشتیی بەریتانیا روونكردەوە و رایگەیاند، هەوڵە دیپلۆماسییەكانی بۆ چارەسەركردنی كێشەكە بەردەوامە و گەشبینی خۆشی دەربڕی هەوڵەكان ئەنجامی دڵخۆشكەریان دەبێت.
لە بەشێكی دیكەی كۆبوونەوەكەدا باسی رێككەوتنی نێوان هەرێم و بەغداد كران و قوباد تاڵەبانی ئاماژەی بەوەدا كە پێویستە هەردوولا بە تەواوی پابەندی ناوەڕۆكی رێككەوتنەكە بن، هەر لایەك پابەند نەبێت رێككەوتنەكە جێبەجێناكرێت و زەرەرمەندی سەرەكی جێبەجێنەكردنی رێككەوتنەكەش هاوڵاتییانی كوردستان دەبن.
