وەزارەتی بازرگانیی عێراق هاوردەکردنی گەنمی قەدەغەکرد تا کۆتاییهاتنی پرۆسەی وەرگرتنی گەنمی جووتیارانی عێراق و بڕیارەکە هەرێمی کوردستانیش دەگرێتەوە.
بەپێی نووسراوێکی وەزارەتی بازرگانیی عێراق، لە ئەمڕۆوە 1/4/2023 تاوەکو کۆتایی وەرگرتنی گەنمی جووتیاران، رێگە بە هاوردەکردنی گەنم نادرێت.
وەزارەتی بازرگانی هۆکارەکەی بۆ تێکەڵنەکردنی گەنمی هاوردە بەو گەنمەی بەرهەمی ناوخۆیە و لە جووتیاران وەردەگیرێت دەگەڕێتەوە.
بڕیارەکەی وەزارەتی بازرگانیی عێراق/ کۆمپانیای گشتی بازرگانیی گەنم سەرجەم دەروازە سنوورییەکانی عێراق و هەرێمی کوردستان دەگرێتەوە.
