ڕێکخراوی یونسێفی نێودەوڵەتی باس لەوەدەکات کەمئاوی هەڕەشە لە منداڵان و گەنجانی عێراق دەکات بە تووشبوونیان بە نەخۆشییە کوشندەکان، داوای گرتنەبەری ڕێکاری بەپەلە دەکات بۆ چارەسەرکردنی ئەو کێشەیە.
ڕێکخراوی یونسێفی سەربە نەتەوە یەکگرتووەکان ڕایگەیاند، “منداڵان و گەنجانی عێراق ئەو دەستەیەن کە زۆرترین مەترسییان لەسەرە بەهۆی گۆرانکارییەکانی کەشوهەواوە، ئێستاش کەمئاوی هەڕەشە لە تەندروستی، پارێزراوی و پەروەردە و فێربوونیان دەکات جگە لە ڕووبەڕووبوونەوەیان بە نەخۆشییە کوشندەکان”.
یونسێف بەر لە کۆنگرەی COP26 هۆشدارییەکانی سەبارەت بە کەمئاوی لە عێراق توندکرد و داوای کرد ڕێکاری توند بگیرێتەبەر بۆ چارەسەرکردنی کێشەی کەمئاوی لە عێراق و کاریگەرییەکانی لەسەر منداڵان و گەنجان.
لوتکەی ئاووهەوا ئەمڕۆ لە گلاسکۆ دەستیپێکرد و بڕیارە تا 12ی تشرینی دووەم بەردەوامبێت، ئەمە 26ـەمین کۆنگرەی لایەنەکانی بەشدار لە ڕێککەوتنی ئاووهەوای پاریس تێیدا بەشدارن.
