بڕیارە ئەمڕۆ پێنجشەممە ئەنتۆنیۆ گۆتێرێش ئەمینداری گشتیی نەتەوە یەکگرتووەکان سەردانی هەرێمی کوردستان بکات و لەگەڵ بەرپرسانی باڵا کۆببێتەوە.
ئەمینداری گشتیی نەتەوە یەکگرتووەکان دوو رۆژ لەمەوبەر گەیشتە بەغدادی پایتەختی عێراق، لەگەڵ بەرپرسانی باڵای حکومی و حزبیدا کۆبووەوە، پشتیوانیی نەتەوە یەکگرتووەکانی بۆ گەلی عێراق پیشاندا بەمەبەستی دەرچوون لە قەیرانەکان.
ئەمڕۆ ئەنتۆنیۆ گۆتێرێش لە رێگەی فڕۆکەخانەی هەولێرەوە دەگاتە هەرێمی کوردستان بڕیارە لەگەڵ نێچیرڤان بارزانی سەرۆکی هەرێمی کوردستان، مەسرور بارزانی سەرۆکی حکومەت، قوباد تاڵەبانی جێگری سەرۆک وەزیران و رێواز فایەق سەرۆکی پەرلەمانی کوردستان کۆببێتەوە.
گۆتێرێش دوێنێ سەرەڕای کۆبوونەوە لەگەڵ بەرپرسان سەردانی چەند شوێنێکی گرنگ و مێژوویی عێراقی کرد و باسی لە کۆنی و شارستانییەتی مەزنی عێراق کرد.
