دوو برینداری رووداوی هاتوچۆ دوای گەیاندنیان بە نەخۆشخانە دڵیان لەلێدان كەوت و نەخۆشخانەی فریاكەوتنی كەلار دەڵێت، بەهەوڵی پزیشك و كارمەندان ژیانیان بۆ گەڕێندرایەوە.
نەخۆشخانەی فریاكەوتنی شەهید هەژار لە كەلار بڵاویكردەوە، درەنگانی نیوەشەوی رابردوو دوو هاوڵاتی گەیەندرانە نەخۆشخانەكەیان كە بەهۆی رووداوی هاتوچۆوە بە سەختی برینداربوون، لە پاش چەند خولەکێک هەردووکیان و لە یەک کاتتدا پێکەوە دڵیان لە لێدان کەوت.
دەشڵێت، بە هەوڵ و ماندووبوونێکی زۆری پزیشکان و کارمەندان بە شێلانی دڵ و دانانی (chest tube) بە ئامادەبوونی (پزیشکی پسپۆڕی دڵ و بۆرییەکانی خوێن و نەشتەرگەریی گشتی و بێهۆشکاری) و بە پێدانی چارەسەری پێویست بۆ ماوەی زیاتر لە کاتژمێرێک توانرا ژیانیان بۆ بگەڕێنرێتەوە.
دواتر لەبەر نەبوونی بەشی چاودێری چڕ رەوانەی سلێمانی کران، لەئێستاشدا دۆخی تەندروستیان زۆر باشە و گەڕاونەتەوە ماڵەوە، وەك ئەوەی نەخۆشخانەكە دەڵێت.
