قائیمقامیەتی سلێمانی رایدەگەیەنێت، ئامادەکاری بۆ هاتنی مانگی رەمەزانی پیرۆز دەکات و سەرۆکی لیژنەکانیش داواکارییەک ئاراستەی هاوڵاتیان دەکات.
رێکان جەمال، سەرۆکی لیژنە هاوبەشەکانی قائیمقامیەتی سلێمانی رایگەیاند؛ بەهۆی نزیکبونەوەی مانگی رەمەزانی پیرۆز و بۆ دڵنیابوونەوە لە تەندروستی و شیاوی ئەو کاڵا و شمەک و خواردەمەنیانەی لەلایەن بازرگان و دوکاندارەکانەوە بە هاوڵاتیان دەفرۆشرێت، لیژنەكانیان هەڵمەتی سەردان و پشکنیینەکانیان زیاتر دەکەن.
وتیشی، “وەکو کاری رۆژانە و پێشتر سەردانی لیژنە هاوبەشەکان سەرجەم دوکان و بازاڕی گەڕەکەکانی شاری سلێمانی و ناحیەکانی تاسڵوجە و تانجەرۆ و بازیان دەگرێتەوە و، پشکنین بۆ هەمو ئەو کاڵا و شمەکانەی بە هاوڵاتیان دەفرۆشرێت دەکرێت، لەکاتی بوونی سەرپێچی شوێنەکە و خاوەنەکەشی رووبەڕووی رێکاری یاسایی دەکەنەوە”.
سەرۆکی لیژنە هاوبەشەکان داواش لە هاوڵاتیان دەکات لەکاتی بوونی گومان یان بینینی سەرپێچی، لەرێگەی ژمارە تەلەفۆنەکان و پەیجی فەرمی قائیمقامیەت لە فەیسبوک، قائیمقامیەتی سلێمانی ئاگاداربکەنەوە بۆئەوەی بەدواداچوونی بۆ بکرێت.
هاوڵاتیان دەتوانن پەیوەندی بە ژمارە مۆبایلی (07708677777)ـەوە بکەن.
