قائیمقامیەتی هەولێر رایدەگەیەنێت، (سەردار ئازاد) كە خاوەنی نووسینگەی فرۆشتنی خانوو و زەوییە لەسەر بڕینەوەی 11 دار لە پاركێك دەستگیركراوە.
بەپێی راگەیەندراوێكی قائیمقامیەتی هەولێر كە وێنەیەكی دەست تۆڕی میدیایی ئێستا كەوتووە و تێیدا هاتووە، سەبارەت بە لێدوانی هاوڵاتی (سەردار ئازاد) كە خاوەنی نووسینگەی فرۆشتنی خانوو و زەوییە و گوایە لە سەر ڕەخنەگرتن لە حكومەتی راسپاردە لە هەولێر نووسینگەكەی داخراوە، بە پێویستی دەزانین بە هەموو لایەكی رابگەیەنین ئەوەی ئەو وتوویەتی دوورە لە ڕاستی و بە لاڕێبردنی ئەو تاوانەیە كە دەرهەق بە ژینگە و سیمایی جوانی هەولێر ئەنجامیداوە.
لە راگەیەندراوەكەدا هاتووە، ناوبرا بەبێ وەرگرتنی ڕەزامەندی و ئاگاداركردنەوەی لایەنی پەیوەندیدار كە بەڕێوەبەرایەتیی ئەندازەی پارك و باخچەكانی هەولێرە و بەبێ ئەوی هیچ دامودەزگایەكی دیكەی حكومی ئاگاداربكاتەوە و لە پێناو بەرژەوەندیی تایبەتی خۆی و بۆ قازانجی گیرفانی، هەڵساوە بە بڕینەوەی 11 داری (شماسی) و هەڵپاچینی ژمارەیەكی زۆری داری (كالیپتۆس).
راشیگەیاند، ئەو هاوڵاتییە هەڵساوە بە هەڵگرتنی سێتی یاریی منداڵان لە پاركی (ئەكوا پارك) كە ڕێكاری یاسایمان لە بەرامبەریدا گرتووەتەبەر و جگە لە داخستنی نووسینگەكەی لە بەرامبەر ئەو كارە نایاساییەی ئەنجامیداوە دەدرێتە بە دادگا.
